و ليت يارجمن بك سنين عديت
واليوم جيتك شفت شيّن حَزنّي
ياليتني يارجم ماعاد لك جيت
بيّنت ماخفيته وماكنت اكنّي
قمت اتذكر ماضي الوقت ياليت
لوكان ماينفع كثير التمني
شين ذكرته يوم يارجم مريت
بيوت حولك سابقن ينبننّي
واليوم أرضك خالية مابها بيت
غير الحصاني برضها يضبحنّي
وين البيوت اللي تونّس الياجيت
مفتوحة الاركان مايقفلنّي
وين الرجال اللي لها السمع والصيت
اللي مجالسهم لها القلب حنّي
اقفت بهم الايام راحوا تشاتيت
الموت اخفى شوفهم اليوم عني
هلت دموع العين مني تفاخيت
عيوني على فرقا الجماعة بكنّي
شفنا منازلهم بذيك الخوابيت
وهلت دموع العين يارجم مني