تعددت أحوالنا والقسى زمْ
حمول الضعاف الي غِطاها رهيفه
راح الزمان الي على الناس به عم
خيرآ كثيف وجود خيره كثيفه
لا والله الا حظنا صار معتمْ
والحِلم نفسه من قساها شفيفه
في هالزمن لا قلت الله واعلمْ
ان القلوب اليوم ماهي نظيفه
ماعمهم لا والذي بخلقه اتمم
عقلٍ يميّز بين حيه وجيفه
مير المواقف تلزم الي يلزّمْ
من ضيقةٍ بالصدر ماهي خفيفه
الجيل هذا يارفيقي يألمْ
صار القسى ويّا القطاعه حليفه
تخالف الاصحاب بالمال والدم
هذا يقول القول وهذا وصيفه
وهذا شبيه بليس وبليس له عم
وبليس عنده مستلم له وظيفه
بالفرقه الي ليلها حيل مظلمْ
ضاعت فصول سنينها مع خريفه
ولاهو غريب الحال لو زاده الذمْ
تقدع نميمه وإتهقوى حسيفه
كلن يقول إنه على الحق عمم
وكلن يغني في كلامه بكيفه
وكلن على كيفه وكيفه يسمم
عقول الصغار الي غدت بالنكيفه
الحرص نعمه لو توقى وتحلمْ
ماطاح دمع وسل هالحرف سيفه
شرحت علمٍ كود هالغير يعلمْ
من واقعٍ شفناه وانباج زيفه
وختامها صلاة ربي وسلمْ
على رسول الله بختم الصحيفه