أتأملك
وأقول ليتي من هلك
وأحث أنا أقدام الخُطا... وأجيك وأرد منهلَك
وأنا هزيل ومنهلِك
وأرواك من عقب السراب... اللي نهاياته لُقاك
وأتأملك
يا رقّتك
إلى تخصّرت بيديك
ويعض ثلجك جمرتيك
وأذوب لك وأنا المهيب... اللي بصدره مستصيب
من عينك اللي ما تروف
يا سطوتك
كيف العذوبة والقسا... بك اختلط هذا المزيج
ما أستغربه
مثل السحاب اللي معه برق ورعد... ضدّين بك منّه بعد
وأستعذبه
أقول بك طاب المسا
وأحضاك يا عشق الصبا
يا مرحباً
تلحّف بغر السحاب اللي مقاديمه رباب وأنت العذوبة والعذاب
يا أجمل محطات العمر... اللي على بالي تمر
أنت الأماني والأمان... إلا على طاري الأمان
أخاف يا هدهد سبأ... تأتيني بشين النبا
أخاف لا صارت سمان... وأبي السمان
اللي ما يتبعها عجاف
أخاف من درب الوداع... دربٍ نهاياته ضياع
يوم أمسك كفوفك بخوف... وأنساب من بين الكفوف
أصابعٍ مثل اليراع
يهمس وكلّه حشرجة... والصوت به لحن الوداع
وقفت في لحظة شموخ
أتأمل إبداع الإله
اللي رسمك وصوّرك
وأتوه في موج الدموع... اللي حجرها محجرك
يتشبّث أطراف البهام... ويصد عنه خنصرك
ما عاد به لحظة شموخ
تايه معي طرس وقلم
أكتب معاناتي وهم
قصّه نهايتها شجاع... طريح في ساحة ضياع
اللي بطولتها مرّه
متمسّك ورمحه قلم
وين أنت يا حرفي تعال
أوّاه يا حرف القصيد
اللي غفى
ليلة جفا
وأهز كتفه ما يفيد
متسنّد جدار الألم... كلّه ندم... ينزف وطوّل بالمنام
قبله صرخ أنا وحيد
هذا المسا... كلّه أسى
جروح وآهات وأنين
أبي دوا
قلبي ذوى
مشيت درب الراحلين... أنا وحرفي من سنين... كلي أمل
وألقاك يا علّ وعسى
أتأملك
وأقول ليتي من هلك
وأحث أنا أقدام الخُطا... وأجيك وأرد منهلَك
وأنا هزيل ومنهلِك
وأرواك من عقب السراب... اللي نهاياته لُقاك
ي للأسف وينه لُقاك