تنحنحت في بيت القصيد ولقيت أفكار
شياطين في هيئة شيوخٍ لهم تقدير
تمركى بصدر البيت شيخٍ عليه وقار
تحوفه عياله بالحشيمة عن التقصير
قلطت ونهض عن مجلسه شيمه ومقدار
قدعت القوافي كنّي بحالة التخدير
بعد ما خوا راسي على دلّة الأشعار
تقندت والأوراق فاضت بشعر غير
تخاطف قدم عيني شياطين ماهي صغار
تسابق على صيد الفرايد من التصوير
سمعها الأصم وشافها فاقد الأبصار
يشاهد جماله يوم الأبكم قوى التعبير
تلوها الجماعة في مجالس هل الاذكار
روى منّها الظامي وخلّا قراح البير
يصفّق رضيعٍ مستمع له مع السمّار
تحرّك لها الساكن وحث الخطا بالسير
وقف لأجلها أصحاب الجلالة مع الحضّار
وخضع كل شامخ هاقي انّه سوات الزير
إلى مرّت الأسماع شفته على الأنظار
رأيت التعجّب بالعيون وبلا تزوير
أنا ي هل الإعلام والفن والشعّار
ماهي تسمح ظروفي مثل من يروح يغير
لو الوقت يسمح جيت من فوق قب أمهار
ميادينها فوق السحايب ماهي بالنير
تخيلون برق وذاك برق السماء بتّار
بكفّي وأعارك مارد الجزل قبل يطير
نحرته بعد ما كرّموا من عشى الأفكار
صحيت أتلفّت بعد حاله من التخدير