عربيد وفيني دين ماهو حيل لكني أصلي
وكنت فالمسجد أسوي مشكله مع شخص ثاني
حتى الإمام أن جيت أصلي يبتسم ويلتفت لي
وأنا يعنني مطوع ماأبتسم من زود أيماني
مزعج لأبعد حد ثوبي أشتكى مني وظلي
ولابه شخص بمنطقتنا عند أبويه ماأشتكاني
كان أبويه دوم يردد والله أني فيك مبلي
الله اللي فيك ياجابر بلاني وأبتلاني
المدارس تحتفل في كل عام بيوم فصلي
عطله صارت بالبلد ويذكر أسمي من نساني
وأنا طفل أجلس وأقوم ولاأحد يجلس محلي
ومن جلس محلي ويله ماأرى اللي مايراني
المشاكل جزء مني والمصايب كل كلي
وكل جسمي طعون ولاني من طعون الجسم أعاني
عدم مبالي وبمزاجي لو مايحصل حصلي
من بغى ينهان يقفي ومن بغى ينعز جاني
ماغزا معيه مهنا ولاخذيته صاحب ٍ لي
ولا غزيت أنا ومهنا ولاخذيته ولاخذاني
أطا راس اللي تعرضلي وأحطه تحت رجلي
وياقرادة حظ واحد مايطيع أصغر خواني
ممتلي من المشاكل بين ظلمي وبين عدلي
ولي بعد في عالم العشاق مخلوق ٍ هواني
غاده ويازين غاده اللي تناديني يادلي
دلي ياحوبي يادلي يابو شامه الأسمراني
الحيا مامن حيا لوعين غاده أغمزتلي
أجلس أهايط عليها ياحياتي وياحناني
ولاأروح بغير عذر أمي تباني وطرشتلي
أمشي وغاده تتصل بي حوبي شو معنى تباني
وأقول ياغاده تباني يعني بدهياني تألي
بس حنا هيك نحكي اللي تباني بدهياني
عشت عمري بين طيب وعربده آخذ وأخلي
ماحسبت أحساب وقتي ولاعرق خد ّالثواني
لو على وجه الليالي برقع ٍ مبطي أنكشف لي
ولو على راس الجبال أعقال يحذف لانخاني
ماحد ٍ له فضل عندي غير أبويه ومن قرب لي
أو رفيق ٍ أعتزي به ويعتزي بي لابغاني
وغير هذا ماأوقرّ حيّ لوبيديه أجلي
أبمزاجي تقلط الدله وأقهوي من نصاني
كلها متساويه وبكيفي أرحبّ وأهلي
والشعر بالوجه ماله أي حسبه في زماني
الشوارب واللحا راحت مع وقت ٍ مولي
الشوارب واللحا صارت لأهل كاس وأغاني
أبو شنب فالمراقص ضايع وراسه متدلي
وأبو لحيه شوّه الأسلام في هدم المباني
ماأقول الكل طبعًا لكن أشويه بخلي
مابي بعض الناس يزعل أو تضيعّه المعاني
السفينه مايله والموج يلعب ومتعلي
يعرف الربان في بطن البحر قدر المواني
والضوامي تارد البير أن بغت تشرب وتدلي
والعتب على يمين ٍ ماقوت جرّ السواني
شاعر ولابي شهاده وزني وقافي شهدلي
راضع ٍ كل الطروق ونابت الشعر بلساني
ولو ما هالقرآن قلت الأبجديه ساجدتلي
لكن أنا وكل حرف نسجد لرب ٍ عطاني
ومن بغى ينقد ويكتب يلتفت لنفسه قبلي
والله أني ماأرد المعجزه للي هجاني
مغرور متغطرس وكل بيوتي هذي تعترفلي
فيه فرق بين ضربات العصا وحد السناني
وهالقصيده زادت بيت ويعلم الله هي أكتبتلي
أنا مملوكه لجابر هايف يشهد من قراني