يابويه ليه تبكي كل ما شفتك وعينك لّي
تخاف أموت يابويه وقبل الموت تبكيني
كفا يابوي لا تبكي وأنا موجود معك وحّي
أجل بعد الرحيل أشلون في قبري توطيني
يابويه لو تموت الناس ماتسوى دموعك ذيّ
وأنا يابوي ميت قبل أموت وأنت محييني
قسم بالله يابويه لجل عينك شربت الغّي
جرعت الهم والحرمان وبحر الويل يسقيني
تحملت السنين اللي طوتني في عذابي طيّ
وصار الجمر بكفوفي وتحت أقدام رجليني
يابويه ماعلى عمري حسافه ولا بقا بي شّي
ولكن بطلبك يابويه تكفا لا تخليني
يابويه مابي غيرك يغسل جثتي بالمّي
وتكفا قبل لا أتكفن يابويه فك لي عيني
بأمر الله يمكن ألمحك وأرحل في عيني ضّي
وأودع وجهك الطاهر مع دنياي وسنيني
وأبي صورتك يابويه أمانه حطها بيديّ
لعل الله يشفع لي إذا صورتك بيديني
وخل الناس تحملني وترفع راسي ورجلّي
وتأخذني على قبري وتكسب أجرها فيني
وأذا جيت القبر يا بوي نزلني شوي شوّي
ووجهني لبيت الله وقبله المصليني
وحط الطين وأدفني وعز اللي يعزي فيّ
ثلاث أيام يابوي يجونك المعزيني
ورابع يوم يا بويه تذكر ضحكتي وعنيّ
تذكر وش كنت أقول يوم أنك تناديني
تذكر يوم كنت أنام في ظل النخل والفّي
تجي يمي تصب الما على وجهي وتصحيني
تذكر جرة الموال وصوت في حباله كّي
تذكر يوم أغني لك قصيدي وانت توحيني
تذكر ضحكتك لا قلتلك يابوي عشقي هيّ
تذكر كم قصيدة خافيه ما بينك وبيني
تذكر كل شي كان وأذكر يوم جابر حّي
ولكن أسالك بالله يابويه لا تبكيني