دام أجتمعنا يارفيقي كل شي بنجبره
عيب ٍ علينا كسرها وأنته وأنا جبابره
أنته سميّ العود جعله في جنان ٍ مزهره
وأنا سميّ الشيخ ربي يرحمه فالآخره
العلم جالك ياولد عمي وجابر مصدره
ياجابر اللي كل علومي روحت له صادره
أربع سنين وفي منامي كل ليله مقبره
وأشوفني أحفر قبر وأجلس عليه أناظره
عجزت أنسى وإن نسيت الحلم جابه وأذكره
شي ٍ أخاف إني أقوله وأنت أظنك خابره
الوقت أوجعني ومبطي وسط راسي خنجره
لاني قويت أشيلها ولاني فقدت الذاكره
اللي بلاني بالخطا قبل أبتلي به منذره
ولادون حلقي غير أيديني والكبير أتصاغره
عفيت يوم العفو عندي في حدود المقدره
وأخطيت في عفو ٍ هدر دم الكرامه قادره
مانيب رب ٍ للبشر وكل ذنب ٍ أغفره
أنا بشر زي البشر وأيامي فيني كافره
ماهمني قول ٍ سمعته من كبار ومبزره
وأنا كبير القوم بيدي وسط نجد ٍ قابره
لكن أبعطيك العلوم اللي بجوفي مزبره
ورّدها عني لجمهور ٍ يمجّد شاعره
الجمر أشوفه يغتصب كل ليل أنوثة مبخره
يعني ترى بفعل الجمر كل المباخر عاهره
والغيمه اللي مانوت هتانها لي تمطره
خذها تراها عند غيري ماتشح وماطره
العين أغنت أطرم ٍ عن حكيّ ذل الحنجره
أطرم خرج من مدخله وأعمى أبتلش بالدائره
والبير اللي تشوفني كل يوم أجيله وأسبره
مابي ضماا بمسع ونين الضامي اللي حافره
والشاعر اللي ردني لسري بذود الجمهره
ترى بيوتي كلها وسم ٍ بفخذ أباعره
لو قالوا عني قول تقذف كل شجره مثمره
ترى الجنون أول لقبّ أطلق على العباقره