ودّعت منهو ماخذ القلب وياه
ليته يقدّر ما خذاه ويداريه
البعد خلّا حالتي عند ذكراه
احن من حالة يتيمٍ لواليه
مع كل مشرق شمس احاول انساه
ولا اقبل علي الليل اذكر لياليه
واليا سترت بداخلي هم فرقاه
بيّحت في شعري حنانه وماضيه
كم مرةٍ حديت قلبي على اقصاه
حاولت نسيانه وخابت مساعيه
وكم مرةٍ دورت بالناس شرواه
واثره خِلق ماله مع الناس تشبيه
من يوم ودّع عيني اللي اتّمناه
وهي اتّرجى رجعته من تجافيه
ليت الجفى ماعذّب القلب واشقاه
او ليت راحت مع رحيله طواريه
طال البطى والنّفس ودها بلقياه
مير الدروب العوج تبعد خطاويه
اثر الهوى مهما هقينا عرفناه
تكشف لنا الايام باقي خوافيه
عزاي ليته ما انْكتب فيه يقراه
يمكن يحس بعين شابت تناديه