سلام الله على سود العيون ورمشها الفتّان
انا من يوم ما شفت العيون السود هايم فيك
وسلام الله على مبسم خليط التّوت والرّمان
ليامنّك تبسّمتي تذوب الرّوح بين يديك
وسلام الله على قلبٍ ملاه الحب والتّحنان
ترا غاية شعوري فيك ألبّي كل ما يرضيك
احبّك وانتي في عمري وطن وإلا بعد أوطان
انا والله لو هبّت رياح البعد ما اخليك
احبّك والسنين تطول ولو طال الزمن ازمان
غصون الحب ما تذبل واحاسيس الغلا تسقيك
احبّك وانتي في قلبي ضياه وفيْ واطمئنان
من اوسع باب لأحساسي تغانمتي صدر مغليك
انا قبلك تذوّقت الزمان المرّ والحرمان
تصوّرت القدر شبّك مقادير العمر تشبيك
وجودك في حياتي عن ليالٍ ماضيه غفران
من اول ما عشقتيني تناسيت الليالي ذيك
جفاف الرّوح من غيمة وصالك ورّدة بستان
خذيتي روح ضميانه حياها الله في كفّيك
ترا ما اشوفك بعيني ولو حبّك عليها بان
احاسيسي هي تشوفك ملاك الله وهي تبغيك
عيونك لا غشاها من صواديف القدر احزان
يبادر كل مافيني عشان ارضاك لو افديك
عطيتك ما ملكته من شعور وخاطري خجلان
اخاف ان المشاعر لو تحبّك ما قدرت توفيك