فيني شتات آمال
وأحلام وسنين
غريق تلعب فيني ارياح وامواج
ما باقي للراحه جهات وعناوين
ولاني مخايل لّي عن الحال مخراج
مدري الليالي تتجه فيني لوين
وساق التفاءل في المقابيل منعاج
مليت اقول ان المقادير بتزين
ولا حَصَلْت لهمّها طب وعلاج
ما بحت عن جرحٍ ولا ودّي يبين
ولا ودّي للغالين في ليله احتاج
ما اشتكي في عسر الايام واللّين
خايف شكاي يسبب لوجهي احراج
ليت المشاعر جرحها بس يومين
ماكان يكويني لهيبٍ من الصاج
والضيقه اللي عنّها الناس سالين
عند الله المعبود بلقى لها افراج
النّفس عانت من مقاديرها شين
لين الوداع اللي خطف ضحكة حجاج
ودّعت منهو مالك الروح والعين
اللي غيابه سبّب لخاطري ازعاج
هذاك لو انّه بشر واوّله طين
الله عطى وجهه من النور وهّاج
لا زل في ضيقي من الليل ثلثين
لقيت بعد الله وفى صدره سراج
كان السحاب العذب وريح البساتين
ريفٍ وحبّي له غدا حوله سياج
بس الزّمن عاده بليا براهين
حطّم من آمال الوصل كل الابراج
رغم الغياب المرّ والفقد والبِين
اغليه لو بابه مقفّل بمزلاج
يبقى له بقلبي شعور ومضامين
وله المشاعر لو جفى عيني افواج
بدر_مطلق