هذّبت فيك القصايد ياحبيب الشعور
وعلّقت قلبي على حبك وقلبي ثمين
عطيتك أغلى المشاعر دون رادع وشور
وفيّضت لك من بحور الحب شوق وحنين
خليت قلبي على قلبك عطوف وغيور
وعلمت روحي تداري خاطرك كل حين
زرعت فيك الوفى والساقي عيّا يبور
ودّي اشوف الحصاد بغصن زرعي يبين
بغيتك العمر يوم العمر دونك عبور
متشابهه دون قربك ياحبيبي السنين
كلما ابْعدَتك الظروف ايام والا شهور
طوّعت لاجل المواصل رغبت العاذلين
ماطعت الايام يوم الوقت دونك يجور
إليا تصعّب وصالك قلت بكره تزين
تبعتك لآخرك وانا طموح وجسور
من عادة العاشقين لشفّهم مخلصين
وشلون في آخر المشوار قلت بغرور
فضلت عن خاطرك خواطر المبعِدين
تركتني بين حرّ الروح وضيق الصدور
ما لنت يوم الليالي فيني عيّت تلين
جرحت رجلٍ محلّه من طوال الشبور
طبيعي انّه يموت وجرح عمره دفين
لا تخلط اعذارك الليله في بعض الامور
وحنى من اول على الايام مستبشرين
باكر يهزّك ندم ويشح حولك حضور
ويموت غصن الوفى ويبات جفنك حزين
رح في طريقك عسى الله مايجازيك جور
وانا لي الله اداوي طعنة الجارحين