سألني منين.. سؤال بيلف يا ساده
وألف جواب يكون الرد.. وزيادة
من البلد اللي فيها البحر ويا النيل بيتلاقوا
عشان تنجب رموز في الكون لها ريادة
دي كفر الشيخ يا مستغرب بكل الحب ولادة
قالوا لي وضح الفكرة وخليها قوام تظهر
عشان قولك في وقت الجد بيأثر
فقلت لهم أنا البلد اللي ما بتشيخ ولا بتكبر
غرامها بيمشي ويا الدم ف. عروقنا ويتمخطر
دي كفر الشيخ يا مستغرب بتخطف عقلنا وأكتر
طب احكي لنا عن أولادها وعن نيلها وأمجادها
وعن نوفمبر اختاروه يكون من أحلى أعيادها
وكلمنا عن الأبطال في كفر الشيخ مع صمودها
وإذا زرت البرلس يوم.. فكلمة حق رددها
دي كفر الشيخ يا مستغرب كنايسها ومساجدها
هنا التاريخ.. هيفتح صفحته البيضا ويكتبها
حروف من نور عن الشهدا ف. مراكبها
(جلال الدين).. برلس كان مواكبها
وشوفوا (جول جمال) دمه فدا ترابها
دي كفر الشيخ.. يا رب تزيد حبايبها
وعند البحر جنب بحيرته لا تنسي
شاعر خلى أحاسيسه لها مرسى
فخلد اسمه وسط كبار إذا أصبح ولو أمسى
دا كان النجم (شرنوبي)
وكفر الشيخ بتتباهى بصالحها وعليه تأسى
يا شعر لفين واخدني معاك.. وأنا ناوي
اكمل سيرة الأحباب على رأسهم بابا (شهاوي)
و(عبد الدايم الشاذلي)و(علي قنديل)
(جمال مرسي) و(سعيد قنديل)
ولو هتعد تلقى كتير في كفر الشيخ تقول مواويل
في كفر المبدعين تسمع لكام شاعر وكام غاوي
وكلمني عن العارف بدين الله وأهل دسوق
وعن سيدي إبراهيم وازاي غمرني الشوق
وعن ناسها وطيب الأصل ويا الذوق
وفيها (زويل).. عمل في الفيمتو ثانيه فروق
دي كفر الشيخ وعلمائها.. يعلوها تمللي لفوق
وفوت بينا على مطوبس.. بدوب في حبها يامه
نشوف القلعه ونسلم على (الذهبي) وكان قامه
ندوق صحن الهريسة نشوف علامه بعدها علامه
ويكفي إننا هنشوف حبيبنا أبو النجا سلامه
دي كفر الشيخ يا مستغرب على خد الزمن شامه
ولو ميلت على فوه بلاد امجاد وليها أصول
فسلم لي على (البيصار) وسلم لي على(زغلول)
وسلم لي على الآثار. مآذنها شموخ بيطول
وترفع صوت اذان ربي يدوي في السما على طول
في كفر الشيخ يا مستغرب.. بفوه كل شيء هتنول
وفين قلين وفين بيلا اللي بتلالي
تشوف الكوره يلعبها حسام غالي
ولو للزعفران جيتها تلاقي حارسها شناوي
وعامر نجم كفر الشيخ تقول يا رب عقبالي
دي كفر الشيخ بلد ابطال في كل مجال بيحلا لي
ولو لفيت فما تلاقي كما بلطيم ومصيفها
ونخل العز راسه لفوق ينام يصحى على اكتافها
فنارها ياما لف ودار عشان يهدي لها ضيفها
فييجي ينام مع النرجس على الجبل اللي شرفها
دي كفر الشيخ يا مستغرب يتوه العقل لو شافها
سيدي غازي بيهدي الحب والتقدير سيدي سالم
ويهدي للرياض ورده.. فيظهر طبعها الحالم
بلادنا في الحروب مدفع ووقت السلم بتسالم
وكلمة حق بتقولها في وجه الظلم والظالم
دي كفر الشيخ يا مستغرب.. تاريخ بينور العالم
ولو يسألني راح اجاوبه.. كرمنا في البلد عاده
ولو قاللي منين جبتوه هرد بعزم واراده
من البلد اللي فيها البحر ويا النيل بيتلاقوا
عشان تنجب رموز في الكون لها رياده
دي كفر الشيخ يا سائلني بكل الحب ولادة