أنا مثلي مثل روحٍ تنازع والجسد جلباب
خذوا جلبابها وتصيح تكفى ضبني دونك
يضج بداخل ضلوعي خفوقٍ منهك ومنصاب
يناديلك قبل ترحل على هونك على هونك
على هونك قبل ترحل على خبري تقول أحباب
أجل وشلون تتركني قبل لا توفي ديونك
أنا والشعر وإحساسي على سطر الورق ننساب
فلا تصدق ردى الهقوه ليا شانت بي ظنونك
غيابك اه يا غيابك سكاكين ورمح وحراب
تغربل في جسد منهك وأنا أتغاضى عن طعونك
غيابك اه يا غيابك زعاف الموت دون أنياب
وأنا الميت على اية حال قبل اتغيب بعيونك
وأنا بيني وما بيني اسولفني عن الغياب
عقب ما غبت بأبياتي جميع الخلق يلقونك
ولا لي ذنب إلا أني أحب ولا حسبت حساب
يجي يوم وتخليني يا تلع الجيد مجنونك
ياليت العمر لو يرجع ولو لحظه نعود اقراب
وسط جوفي لظى نارٍ تطفي برد كانونك
كثر حبك بحفاقي أنا شايل عليك عتاب
ومهما تغيب لا تصدق يجي يوم وأنا أخونك
ولا به شي بالدنيا يوترّني ومنه ارتاب
سوى حظورك أو ينادوا سميّك أو يطرونك
لك الله حيل يشتاقك شعورٍ ما حواه كتآب
ولكنه مع إحساسي وصدق الشوق يقرونك