أحيان ادوّر للقصايد عناويين
فيها من الغيّاب قسوة جفاهم
واحيان حتى احيان تشتاق غالين
لا هزّ غصن الشوق نسمة غلاهم
شبّ الحنين ونادت الروح مقفين
ولولا أخاف الله لانبش ثراهم
أصدق من الدمعة على طارف العين
حجم اشتياقي واحتياجي لقاهم
شدّوا رحايلهم مع الموت والحين
ما باقي الا ذكرياتي معاهم
أموات.. لا والله، أموات حيين
بعيون قلبي كل نبضه أراهم
ولو تبطي الدنيا على العهد وافين
لا عاش راس ن في حياته سلاهم
والخالدي لا شبّ الاحساس بيتين
ينثال طاريهم جروح ومراهم