شاطي الدمام والأمواج والسحر الخرافي
والقمر لا من رسم فالبحر لوحة شاعرية
بينهم قلت اغسل احلامي بتنهيدة قوافي
قبل اعرف ان الشعر تنهيدة الروح الخفيّة
القلم أصبع! ورمل البحر دفتر لاعترافي
وبين مد وجزر تغرق روح وتضيع ابجدية
يا بحر.. ما جيت ادور بك سوالف عن جفافي
جيت افتش عن جروحٍ مالها روحة وجيّة
ناضج الجرح يتمادى كنه يدوّر قطافي
وانت يا غايب قطفت الروح بغصونٍ ندية
يا حبيبي وانت ملح البحر واحضانك مرافي
ودي اغرق بك ولا ودي أحد يمسك يديّه!!