مال غصن الحكي بما لذ منها وطاب
فتنةٍ... تستفز الغيم قبل القلوب!
لا امتطت مهرة الأشواق فوق السحاب
تعسف الجامح اللي لا عشق ما يتوب!
تربك العقل لا من سولفت بارتياب
عن مشاعر غلا مستوطنة فالدروب
مشطت شعرها واستوغلت بي وغاب
كل حزنٍ مثل شمسٍ بوقت الغروب
ضحكها لا تهادت دعوةٍ تستجاب
فتنة الريم فيها ما تعرف العيوب!!
ما تشابه سواها بس مثل الضباب
يعمي العين عن غيره وصدقه كذوب!
قلت: يا مُجرمة واجرامك اشهى عقاب
يدخل الروح لو ماله ف روحي ذنوب
ساخنة قهوة احساسك وسكرّك ذاب!!
قبل مدري من اللي ذاب واللي يذوب!!!
غمّضت نصف عين وقلت ما لذ طاب!!
فرصتي! أستغل الغيم وسط القلوب