هَتْشُوفُوا أَنَا هَعْمِلْ إِيهْ
وَهَحَقَّقْ حِلْمِي ازّايْ
أَوْعِدْكُمْ هَوْصَلْ لِيهْ
وِالزَمَنْ الطّيّبْ جَاي
دَا حِلْمِي وَأنَا اللّي حِلِمْتُهْ
وِكْفَايَه الرُّوحْ حَسَّاهْ
مَهْمَا تْقَلّلُوا مِنْ قِيمْتُهْ
مشْ مُمْكِنْ يُومْ أَنْسَاهْ
أَنَا بَحْلَمْ مشْ عَلَشَانْكُمْ
يَاللّي انْتُوا بِتِتْحَدُّونِي
نَشّنْتُوا وتَانِي نَشَانْكُمْ
خَابْ مَا عْرِفْتُوا تهِدُّونِي
وَلَا يُمْكِنْ هَتْخَلّوُنِي
بِكَلَامْكُمْ أَسِيبْ الْحِلْمْ
أَنَا شَايْلُه فِ نِنْ عُيُونِي
وِدِي حَاجَه بَسِيطَه لِلْعِلْمْ
أَنَا آسِفْ مشْ هَتَنَازِلْ
عَنْ حِلْمْ حِلِمْتُه زَمَانْ
لَا أنَا كُنْتْ فِ يُومْ مُتَخَاذِلْ
وَلَا كَسَرَتْنِي الأَحْزَانْ
أَنَا بَحْلَمْ إِنْ أَمَلْنَا
يِفْضَلْ عَايِشْ عَلَى طُولْ
مَنْمِلّشْ مَهْمَا عَمَلْنَا
وحَاوِلْنَا وِمشْ بِنْطُولْ
ونْحَاوِلْ تَانِي ونِبْدَأْ
وبَلاشْ الْيَأسْ يِسَيْطَرْ
كُلْ مَا تِقْسَى وتِغْمَقْ
نِرْجَعْ ونْحَاوِلْ أكْتَرْ
والنّاسْ هَتْعِيشْ وِتْشُوفْ
الْحلْمْ ازّايْ اتْحَقّقْ
وسَاعِتْهَا يكُونْ مَكْسُوفْ
كُل اللّي زَمَانْ اتّرْيَقْ