قالت مسا الخير يا شري ويا خيري
يا مجاهد الوقت لو ناب الدهر ضاري
قلي وش أخبارك اللي ماهي ل غيري
لا يا بعد من نشد عن طارف أخباري
قلت استشفي علومي من تعابيري
واقري تعابير وجهي داخل أشعاري
لا يوجعك حزني، ابتسمي ل تصويري
لك دمعة الكاتب اللي تطرب القاري
ب أرض الجلادة دفنت أوضح تقاريري
وب حرف شعري لمع برقً من أسراري
على دروب الكفاح اغلب مشاويري
بغيت درب الفلاح وطال مشواري
اضحك واغني علم سيري علم سيري
لو أنها عيت القمرا على الساري
ما بي سوالف هل النمات! تقصيري
ولا جيت أطاول هل الطولات! ب أشعاري
لا شك يا فاتنة هذي مقاديري
لا تنشديني ليا ضاقت وش الطاري؟
أنا بلاي الوفا معهم، وتفسيري
ل أكثر تخاذل ربوعي ب أطهر أعذاري
أعطيك من دم جوفي طير يا طيري!
يطير لكن يجي ب جحوده مباري
ماهوب طيبي معاه اكبر مخاسيري
والله ما موجعني إلا تيهة أنظاري
يا ظني أسف وهاك أصدق معاذيري
الصدق والنية اللي قصده الباري
ولو كلمة الطيب ما تقوى ل تخديري
ما كنت في سوقهم بايع ولا شاري