على الله جل اسماه اعتمادي
رفيع الشان خلاق العبادي
عزيز ما يخيّب من لجا له
سميع ياصله صوت المنادي
قوي الناصر موسى على اللي
تنادى بالغرور وبالعنادي
يمد اللي طغى من زود حلمه
ويرهب لا بطش بأهل التمادي
عظيم الشان خلاق البرية
الهي فزعتي عزي سنادي
عساني كل ما ضاقت نصيته
ولا انصا لا صديق ولا معادي
وعساني كل ما ضقت دعيته
يزيد اجري ويعطيني مرادي
وعساه يزيدني من زود فضله
ما هو من زود جدي واجتهادي
وعساي ليا فعلت افعل لوجهه
لحيث اللي ماهو لله غادي
وعساي ليا حكيت يسوق قولي
على درب الهداية والرشاد
بعد ذكره وتمجيده تعالى
هو البادي وذكره خير بادي
اصوغ القاف واكتب من جديده
على طرق يهيض كل شادي
وأسوقه صوب شيخ طيب فعله
جذب شعري لمدحه دون حادي
كلام من صميم اللي كلامه
ما هو حسب الهوى... حسب المبادي
احشم الشعر عن مدح الزلايب
مثل ما يحشم الجار المهادي
أسوقه سوقت الفنجال الأشقر
على الطيب واعديها الربادي
سلام الله سلام من ضميري
عدد ما زاف نبت وسال الوادي
على أبو أحمد حميد الذكر حيثه
من اصحاب المكانه في فوادي
وحيث انه من رجال المروه
وفي ذروه سنام المجد بادي
أبو حيمد ليا من حل ذكره
على أسماع العرب ما مر عادي
حليف النعم واللي يكسبونه
من وجيه العرب حضر وبوادي
عريب الساس محمود الخصايل
رفيع البيت مبسوط الليالي
تماري به تميم وتفتخر به
حمول الخيل في يوم الطرادي
تسلسل من بني العنبر جدوده
حميدين النبا سقم الأعادي
رجال ذكرهم بأرض الجزيرة
يعطرها الفخر عنبر وكادي
عيال هلال بن مزروع ربعه
وهو من دون حاجتهم يفادي
يا ما والله براسه من حميا
ومن طيب المعاني والمبادي
تجرِّي من بغى مدحه فعوله
من اجزال المكارم باي وادي
تحوش الطيب والجزلة يمينه
يمين اللي على ماله نفادي
كريم بالفعايل والعطايا
ولكنه بلاقوال اقتصادي
يشد الانتباه ليا تكلم
حكيم منطقه صايب وهادي
وأهل عودة اسدير ابرز شهودي
دعاله من سكنها واستفادي
دعم فيها المشاريع العظيمة
مشاريعه بها ماله ملادي
وأنا يصعب علي تعداد فعله
ولا اقدر لو تعدون الجرادي
ولكن جيت بعطيكم بعضها
وينصفها من الناس الحيادي
هلا القران واللي يحفظونه
دعمهم قبل ياديه المنادي
دعم داره ومن يسكن بداره
وخدم بخلاص في باقي بلادي
ومن عذر الملوك يقدرونه
عسى عمره وقدره بازديادي
عسى ما قلت به يلقى قبوله
وأنا ما قلت غير الوكادي
وصلى الله على محمد وسلم
شفيع الخلق في يوم التنادي