لا تلومني يوم اندفع لك محبّة
ما تسمع اللي فيك يصرخ بصدري!
لو كان هذا الحب نزوة وهبّة
ما بحت بإحساسي وسلمتك أمري
لا تلومني، حسنك بحر من يطبّه..
تلعب به أمواج الفتن وأنت تدري
من وين له منجى سوى لطف ربّه!
الناس معذورة ولا شفت عذري!
ليه أخفي إحساسي عن اللي أحبّه؟
أصبر إلين تقول ما عاد بدري!
مير الصراحة كاس دايم نذبّه
نستعذب التمثيل والثقل يغري
مديت لك جسر الهوى، لا تشبّه
لا تزيدني خيبة أمل فوق صبري
ارحم خفوقك واترك اللي لعب به..
وأعوضك عن ما مضى طول عمري