الصاحب الساحب طويل الذراعي
اما رفعك الفوق ولا على القاع
اعطيك فكره وانت فاهم وتاعي
وعليك تبصم للمجرب بلاصباع
حذراك لاتدخل بيوت الافاعي
واحذر من الصاحب اليا صار مذياع
لاتامنه بالسر بكره يذاعي
ويصير جلدك بين ماسك وقطّاع
خلك بعيدٍ عنه مافيه داعي
تعطي وتاخذ منه لو كان سماع
عن موجه العالي طويت الشراعي
وماني على كثر الاصاحيب طماع
يكفي عن الميّه حسين الطباعي
لاصار في سرك حصينٍ ومناع
وافي ولك عند المواقف شجاعي
ولك في علوم الطيب مرتع ومرباع
سره منيع وفي ظروفك يراعي
قدره رفيع وعنده الطيب ماضاع
هذا هو اللي عشرته ماتباعي
ويبقى على طول الزمن ضل واشراع