ياصاح انا قلبي من الهم طاويه
وشلك تتل القلب ياصاح قلّي
خله مكانه لاتزّود بلاويه
يكفيني اللي من زماني حصلّي
ماعاد عندي داخل القلب واعطيه
الا همومٍ بالتعاسه تطلّي
مابه مكاسب لو تبيعه وتشريه
وجرحٍ نزف بالقلب خلّه يولّي
ان كنت ناوي له تكثر دعاويه
شرهّت خفوقي يالغضي ماتسلّي
تبلش اليا منه فتح كل ماضيه
ومن العتب مليان باسباب خلّي
وان كان له عندك من الحل يرضيه
يرتاح له قلبي وانا اجيك كلّي
بادر بهذا الحل سرّع خطاويه
وانا سريعٍ بالخطاوي واهلّي
بيدك تخفف مامضى وانت راعيه
وبيدك تعاقيد المسائل وحلّي
هذا ترا بالمختصر كل مافيه
راعي ظميرك وانت مسلم تصلّي