يا مْحمد ابوصيك.. ؛يا مْحمد ترى الدنيا دروس
مرَّهْ تجي لك مقبلهْ واحيان تقفي مدبرهْ
نصيحتي لك والنصايحْ ماتثمّّنْها الفلوس
كثرةْ همومَ القلب لا زادتْ عليه تدمّرهْ
تصادُم الافكار في عقل الفتي حربٍ ضروس
يمسي ويصبحْ كنّ قلبهْ فوق نار المجْمَرهْ
حافظ على دينك هوَ المنجاة في اليوم العبوس
صلّ الصلاةِ بْوقتها حتى تنال المغفرهْ
احفظ لسانك وانتبه للنفس من بعض الهجوس
بعض العلوم تْحُطّ من شان الرجل وتحقِّرهْ
واحفظ غلااخوانك ترى اخوانك لك اسيوف وتروس
وخلّك مُوالي لابْن عمّك ل اعتزى بك تنصرهْ
واحفظ كرامةْ قلبك الطيِّب عن اضعاف النفوس
الحُرّ من طبعهْ طريق اهل الردا ما يعبُرهْ
اللي يعزّك يشتريك وما تغيرْهَ الطقوس
خلّك معهْ وافي ومن قدّرْ جنابك قَدِّرهْ
اللي تسُرَّك وقْفتهْ لا صارت ايامك نُحوس
اذا نصيتهْ شرّفك وان شاف عيبك يسترهْ
وخلّ طيبك مثْلما قالو عسلْ في حَدّ موس
اللي يجي لك بالغثا تقطع غثاهْ وتبترهْ
واحذر من اللي لا مشى يختال في مشيةْ عروس
بعض البشرْ ماودّك الا في ثيابهْ تقبرهْ
واتجنّب اصحاب الرّدا لا تصحب الغِرَّ الغَلوس
مانَخْبُر انّ الصقْر قالو انّهْ مخاوي قُبّرَهْ
اللي يجي يامرحبا لا طاب له عندك جلوس
واللي مقَفّي لا تمسّكْ في غلاه وتجبرهْ
الناس لو صنّفْتَهم تلقاهم اشبهْ بالغروس
ذي غرسةٍ جَرْدا وذي شوكهْ وهذي مثمرهْ
والبُرّ لا منّك بذرتهْ في الرمال وفي الطُّعوس
بالطبْع ماتجني حصادهْ من رمالٍ مقفرهْ
واذا بذرتهْ ف ارض خصبهْ. ينبت الحَبّ اليبوس
سنابلٍ من طيبها تنتج غلال امزبّره
هذي وصاتي يامحمد وانت راس ونسل روس
ابيك تحفظها ولك فيها دروس وتذكره