ابكي على موتٍ سرق داعي الشوق
وابكي على اللي مرّ مثل السحابة
وأبكي على ذكرى وطاري ومخلوق
وداعة اللي حلّ موته نهابة
طوّق علي الموت في واحتي طوق
تجتاحني لا شك فاتك نيابه
هذا دفا صوتٍ من الموت مخنوق
في سكرة فراقه وكشفة حجابه
ابكي على حصة وابكي على شوق
وابكي على اللي ظَلّها في ثيابه
يلفظ بصدرٍ حار زفرات وشهوق
ويعجّ في حضرة قدومه هيابه
وابكي على كفٍ ولمسات وعروق
وابكي على اللي في كفنه المهابة
وجهٍ تشوفه من سنا النور مسروق
يدلي عليه العفّ، طاهر حجابه
وعينٍ نديةٍ كلها نور وبروق
وقلبٍ توّقف في مخضّم شبابه
وابكي على اللي صح له ألف منطوق
وابكي على اللي انردم في ترابه
وابكي على اللي وجهته عقبهم فوق
روّح حليل اللي تسمّى نشابة
راح وترك بالقلب ندبات وشقوق
وشفت الجنايز كل أبوها تشابه
ألا غطاكَ مفززّ قلوب وخفوق
حتى المغشّم في وفاتك وعابه
سمح المحيا أبيض الوجه مطلوق
يرقى على علوم المراجل هضابه
يرقى بها لو هو على الطيب مرهوق
سايق بها يا شوق أطيب ركابه
وابكي وداعة عالي الصيت والذوق
روّح وله قومٍ كريمة ولابه
اقفى وله بالعز وقفات وسبوق
قصّر طويلاتٍِ وذلّل صعابه
وابكي على اللي ساق بالكايده سوق
وابكي على غاليه ليلة مصابه
ياللي رحلت وغص في موتك حلوق
روّح وربي واحدٍ يرتجى به
مدري علامي في موادعه محروق
ياجعل يسقى كاس زلِّ شرابه
عجلٍ على الفرقا وبالخاطر علوق
قلبه علامه بالعمر ما بطابه؟
ابكي وسط نجد العذية على شوق
فاقت سلايل مدّعين النجابة
كَلّ الكلام وجف في موتك عذوق
وحال السحاب اللي هقينا ضبابه
وابكي قطع بالمرجلة عهد ووثوق
وارهى عسى ربي يثبّت جوابه
ابكيك علّ بطاري الخير ملحوق
ويا جعل ما ضمك شريحٍ رحابه