آه يا كثر التعب بين الضلوع
لا قريت في وجهك الليلة تعب
ينطفي في ضحكتي عيد الشموع
وينسدل ليل الحزن فوق الهدب
صاحبي... وإن كان مرتك الدموع
خلها للي غدى جوفه لهب
وإن نبت بين الشفايف غصن جوع
للفرح... اقطف من جروحي رطب
حد هذا الموت مجنون وولوع
لو غديت لسيرة أحزانك حطب
ما رجيت الشمس لا خان الطلوع
دام لي في قلبك أحباب ونسب
يا نهار اللي نهاره ألف نوع
يا نصيب اللي نصيبه شي عجب
سيدي والحزن في عيونك يروع
تزيد أوجاع مجنونك تعب