أحدٍ يجيك ومنوة العين لا جاك
يقضي لزوم وينصرف في دقيقه
وأحدٍ يقول إنه يودّك ويبغاك
وتلقى ب فعله شي مالا تطيقه
وأحدٍ يفزّ الياسمع بس طرياك
وأحدٍ على طرياك يشعل حريقه
وأحدٍ ما بين الناس.. ذولا وذولاك
مثل الذهب لامِع بروعة بريقه
هذا هو اللي.. صحبته كان خاواك
يجلي عن العوج الهموم وطريقه
وأحدٍ يجيك وراجيٍ من عطاياك
وإذا حصل له شي لا بلّ ريقه
ياسرع مازوله يقفّي وينساك
لو كان أعطى لك عهود ووثيقه
يا صاحبي ربي يحفظك ويرعاك
هذي الحقيقة والبلا بالحقيقة
حزمك وعزمك بين أصلك ومرباك
عند العرب سِلم ومبادي عريقه
وان ضاق صدرك خالقك رب الأفلاك
ترا الفرج دايم خلف كل ضيقه