جاني يسأل، كيف حالي في غيابه
أحمد الله والله العالِم بحالي
ما كأن قلبي تركته عند بابه
والزمن وقّف وأنا واقف لحالي
وش يبي منّي! وش اللي صدق جابه!
الصُدَف! وإلا الندم طول الليالي!
ما بقى فيني شبر يقوى عذابه
كلّ شيء ينزف ألم.. حتى ظلالي!
آه يا كثر الخطاوي لاجتنابه
وللأسف طيفه بحلّي وارتحالي
إن ظهر أضعف وتخذلني المهابة
وليلة الفرقا تعوِّد في خيالي
كنت بصرخ واشتكي حضرة جنابه
مير قلت أني بشوفه طاب فالي!
جاني يسأل، كيف حالي والإجابة..
صاحبٍ غالي وجرحي منْه غالي