المومس
القعيدة
وقفت لحظة نتأمل أيام وسنين
فوجه عجوزة قاربت السبعين
فركنة مظلامة تبعث أنين
تناجي ربنا وتقول يا لحنين
انا اللي زغت وتلفت فالزحمة
انا اللي جرت وطغيت بالكلمة
انا اللي صلت بحال النجمة
انا اللي غلطت شوف بعين الرحمة
ربي فين لخوت والوالدين
مشى المال والجاه مشى الزين
مشى القد والسالف والعينين
ما بقا غيرك يا لكريم لحنين
كنت فداري فعزي وشاني
نلفها بحبي وعطفي وحناني
ما مشيت لحد ولا حد عمرو جاني
حتى ليوم فلحمام شيطان غواني
لقيت عكوزة قلت نبرها بحال امي
شكات لي همها وشكيت لها همي
بعد تحاكينا قالت لي بنتي تخدمي
قلت لها أنا فعزي وشاني ايلا تفهمي
قالت شوف خدمتي وداك الساعة حكمي
فليوم الاول عرضتني لقصارة
حديث شهوة وكيسان اتاي دوارة
وتوالات لعرضات فرحة وبشارة
وانا ما على بالي لعكوزة مكارة
سقاتني لخمر بلباقة وشطارة
ولعبت لعبتها اللفعة الغدارة
لقيت راسي فارقة داري واولادي
وضحيت حديث الماجي وحديث الغادي
نكروني حبابي وناسي نكران ابدي
ولي شافني ينعتني ويقول هيا هذي
تقاضى ما كان عندي من مال
وليت نخمم فحالي والمآل
لا قرايا قريت ولا كسب حلال
وبقا كل راس مالي الذات والجمال
بديت ندور من دار لد ار
ولا فمي نعام وخيار
نساعف ونصبر ونتجرع لمرار
بنت الليل بالليل وخدامة بنهار
غلبت بزيني جميع بنات الليل
وتزايدو عليا لي بحالي فالويل
كروش لحرام تقلوني بالمال الثقيل
حتى ليوم لقاني راجل جليل
ذكرني بايام كنت نسيتها من بالي
بوالديا وخوتي وراجلي وعيالي
بكيت وبكيت ولحت علله حمالي
وتبت وجعلت فالله كل املي
عشت فدار الشيخ سنين وسنين
وتليت وراه نمد للناس اليدين
ما شبعت كرشي على فين وفين
وجلدي لي كان حرير فلين
قساح وتجدج بلبرد والشقا والتصبين
ومشات ليام ولعمر طوال فلعذاب
وكثر المرض ومشى الجهد والدراع داب
خلاص التوبة وما داروه فيا الدياب
هذا ما جناتو يدي وما كان عليا مكتاب