فين حارتنا
الفين سلام وحته
ع الناس الطيبين
ع اللي ساكنين جيرانا
عم احمد واسماعين
على صحبة وعشرة حلوة
عشناها من سنين
تلقى دموعنا بتنزل
لو واحد كان حزين
او واخد غاب ماقالشي
وعياله محرومين
أو نفرح لما واحد
متغرب من سنين
راجع ومعاها فلوسه
حايكمل نص دين
واختارعروسته طبعا
بنت محمد ياسين
وياسين دا اصله مجدع
زي محمد شاهين
دول همه ولاد حارتنا
دول همه الشقيانين
دول همه اللي بإيديهم
طردوا اللص اللعين
واللص أكيد فهمتوا
اللص دا يبقى مين؟
مش راح اطول عليكم
الكل عارفه مين
يوم سته ف شهر عشرة
أو عشرة ف شهر تسعة
أيامنا المبروكين
ياسين وأخوه شاهين
عدوا الشط الحزين
وصاحوا الله اكبر
الله ع المعتدين
الكل قال وراهم
والرمل قال نداهم
والشمس الساطعة فوقهم
برضو تردد معاهم
ورجعتي يابلدنا
يإيدين أشجع ولادنا
بياسين وأخوه شاهين
ماهو دول اولاد حارتنا
الناس الطيبين
دلوقتي فين حارتنا
زادت والله حيرتنا
بإيدين أولادنا ضاعت
م السكر والتدخين
وايدينا فوق خدودنا
غصبن قايلين نصيبنا
ونصيبنا ياناس برئ
طول ماحنا موهمين
وغيطانا قل خيرها
وولادها شافوا غيرها
وغيرها مش فلاحة
في الغربه بياعين
بيبيعوا ف كل حاجة
ويقولوا يالا غابة
والقرش في يوم حينفع
ويكرَّش في التخين
وأما ارجع تبقى تفرج
على أهلى لما أفرج
وبحتة هدمه اهادي
لام احمد ولشيرين
وهيه دي حارتنا
طب قولوا فين حارتنا
بعد ماراحت حارتنا
حنعيش دلوقتي فين