داوي طعونك من سيوف المذلّه
خلّك عزيزٍ لا تخونك مخابرْك
مثل الجبل شامخ رفيعٍ محلّه
ومثل القمر بارق وكلٍّ يسامرك
ومثل الصقِر صيّاد صيدك تتلّه
محد يتلّك في شِراكه وياسرك
في كلّ وقت وْ كلّ دربٍ تدلّه
ومع كلّ ولفٍ في هيامك يعاشرك
يالعزّ لك سيفٍ على الذلّ سلّه
لا ينكسر سيفك ترى الذلّ ينحرك
ويالخير لك مبسم على الغير فلّه
لمّا يعَرف الغير قدرك ويشكرك
الخير ما ينفع لنفسٍ مغلّه
الغلّ طبعٍ لى نوى الشرّ يذكرك
يحشد جيوش الكره والغدر كلّه
ويبدا يحارب كلّ خير بْمشاعرك
احرص جميع الحرص للّي تعلّه
من خيرك اللي هو قراح لْعشايرك
والضاميَ اللّي ما يقدّرك خلّه
وأقعد مع اللي من خفوقه يقدّرك
هذي وصايا العزّ خذها مظلّه
لمّا هجير الذلّ يوجع نواظرك