حضن وبكاء
أحتاج بس حضن وبكاء
اللي بصدري شي كبير
أكبر من اللي ينحكى
ما ودي أتكلم… تعودت السكوت
يكفيني أتألم… وأموت وما أموت
والعمر ما همه يفوت
ابسألك من هو قدر…
يرتاح من ليل الكدر…
يوم اشتكى!
بالله ضميني وبس…
بس ضميني
أحتاج بس حضن وبكاء
حتى يجف الدمع وأشهق
لي خافقٍ بالحيل مرهق
حزن وغضب
حاولت والله أكتمه
أتفهمه.. لكن صعب
المشكلة فوق الغضب
ألقي أحد يشره علي!
يحكم علي!
يكوي بنيران العتب
وهو السبب في كلّ شي!
مع الأسف ما أقدر أرد..
ما فيني حيل من التعب
بالله ضمني وبس..
بس ضميني
مليت من طول الخصام
شاب الشعر كثر الملام
ما أبي أبرر موقفي
ولا أبي أي اهتمام
اللي أبي نسمة سلام
باللي بقى من ذكريات.. لو هو قليل
عطر وأغاني وأمسيات.. كانت دليل
أن الحلو في هالحياة
يذبل بنكران الجميل
لولاك والله مستحيل..
أقوى على جرحي وأحب
بالله ضميني وبس..
بس ضميني