كان عندي حلم
اسمو واد الزيتون
كان يعانق واد الجوهر
كان يحضن لعيون
يسافر لقنطرة بن طاطو
يروي الرمان السفري
والنكاص المسكي والزفزوف
يشرق بالشمش
يتكبل بالخوف
يهرب لسبو
يحكي وهو ماشي امجاد تاريخ كتبو
يقول للبرج العالي
يا برج الحجر تاليك تتكسر
العلو ديما للحدورة
كنت نخاف من واد الزيتون
كان يقول لي قرب مني...
انا ما نخوف غير الشماتة
ملي قربت منو شي حد دفعني...
حضني...
سرى فدمي من فمي..
من كمي فقلب قلبي ناداني
اشاعر غدا...
اليوم حضنتك ورخيتك
باش تعقل
نسيت ما كان بيني وبين واد الزيتون
واليوم ملي تفكرت لي كان كان
ويمكن فات الفوت
وفات الاوان
نشف واد الزيتون لحقتو الموت
نسيت كلشي...من غير حب الرمان
لا
باقيا فراسي حجاية كتقول
دابة يجي يوم
تقلب علنكاص المسكي
تلقى بوعويد
وتقلب عالرمان السفري
تلقى حب الفنيد
وتقلب علزفزوف تلقى القديد
وتقول الله عليك اواد الزيتون
باب فتوح تطلق... بوجلود تطلق
بيبان ولادة
وعلاش واد الزيتون نشف
تسف
ريحتو تخنق
مصاب لو كون تعلق...
تسلق
لبرج سيدي حماموش
لويسلان...لو كان تفرق
وما عوق
كذبة...حلامة
قال لي صاحبي..
حلامة واد الزيتون
يمكن شي نهار تتحقق...
زيد...
قلتلو الزيادة من راس لحمق