ما شي حل

ما شي حل...

تسكت الكلمة ا وترحل...

تمشي الكلمة بلا رجوع

ماشي حل يركب الحرف الذل...

يخاف... يهبل...

او يموت بالجوع

ماشي حل باش تسكت شهرزاد...

تتقج

حيت الدنيا ما عطاتش الطوع

ايلا تسكت شهرزاد

شكون يسكن لجراح..

ايلا تسكت... شكون يسكت النباح...

شكون يقول كلمة حبلى...

كلمة مكلمة بارود

يلا تسكت

شكون يقول ربي كاين موجود

وخا منشورة فوق خيط راشي..

زعما ما تقراشي..!!!!

خيط رشا بالرشة...لي تفرح غير الصبيان..

رشة التواشي..

نولي لك ونقول اشهرزاد خرج الكلمة ما بين السنان

فاجي بيها لي ما عندو لسان

مرجوعي ليك اصاحبي...

خلي خيط النور يدوز...

يولي واضح ما يبقاشي مرموز

نقولك اصاحبي انا وبزاف بحالي لا تسكت...

صدح بكلام تامر...

كلام جوفو عامر...

لا يقول لك هدرتي او سكتي كافر.

شبهولي الكلمة بترنجة...

غير يصوط الريح تطيح

تعفصها الرجلين العوجة

...حيت خيطها على سبة ما هواش صحيح

قالوا لي الكلمة حوت...

غير تخرج ملفم تموت

حيت ما عندها يدين ولا رجلين...ولات بلا دين

آهك اصاحبي كتبها..

كتبها بالفرحة صور

رسم بها البسمة قمر...

تعلمت نحب الكلمة...

قدام مراتي وقدام الناس

وايلا تسكت أشهرزاد

شكون يعلمني الحكمة...

واش تبغيني نبقا بلا راس؟؟؟