الْحَالْ صْبَحْ
وْشَفَّقْ بَضْيَاهْ
وَالزّْهَرْ فَتَّحْ
وْفَاحْ بَشْدَاهْ
الطِّيرْ سَبَّحْ
وَصْدَحْ بَغْنَاهْ
الْكُونْ فْرَحْ
بَرْبِيعْ هْنَاهْ
الْوَرْدْ نَادِي
وَالزّْهَرْ بَعْد الّْلقَاحْ
طِيبْهُومْ شَادِي
وَعْطَرْهُومْ فَوَّاحْ
يَنْعَشْ الْغَادِي
وَالرَّايَحْ يَرْتَاحْ
عَرْصَاتْ بْلاَدِي
يْسَلْبُو لَرْوَاحْ
أَيَّامْ الرّْبِيعْ نْزَاهَة
مَهْرَجَانْ فْنُونْ
فَاضَتْ لْوِيدَانْ بْمَاهَا
وَسْوَاقِي وَعْيُونْ
وَزْرَابِي لْعِينْ تَتْمَلاَّهَا
عَلَى كُلّْ صَنْفْ وْلُونْ
عَكْرِي وْخَابُورِي وَارِي
فَبْسَاطْ عَبْقَرِي مَنْ خْضُورَة
سُبْحَانْ رَبّْنَا لْبَارِي
لِّي بْدَعْ لْكُونْ فْأَجْمَلْ صُورَة