أجمل شيء في الدنيا بجد
سر ما قولتوش لسّه لحد
إنك تعمل واجبك بدري
أصل الوقت سريع وبيجري
وتنام رايق مش متضايق
تصحى نشيط من نومك بدري
أول حاجة.. تروح تتوضى
وتصلي عشان ربك يرضى
وتصبّح على ماما.. وبابا
بعدين تفطر.. بس بجد
إوعى تقول ع السر لحد
بعد ما نفطر نعمل إيه
عارف طبعًا.. ما انت نبيه
نلبس لبسنا طبعا شاطر
ناخد الشنطة وخليك فاكر
بوسة لماما، وبوسة لبابا
وما ننساش قَفل البوابة
ع المدرسة على طول يا حبيبنا
ونوري لأستاذنا واجبنا
وان قام يشرح نسمع شرحه
وما نلعبش في وقت الجد
إوعى تقول ع السر لحد