الواد ده كان قوّااال
ولسانه كان لبلب
ماله بقى طبّال
ولسانه نازل دب
عمّااال على بطّال
رايح... وجاي... يكذب
يا عم نجمك قفل
ما كفاية لبخ... وروح
شكلك صحيح مسطول
وأخدنا فيك مقلب
السن له أحكاااام
والعقل له قُدرة
والدنيا فيها نظام
والكون ملاااان عبرة
والسيف ما يبقى حسام
لو بردت الشفرة
وانت ملااان أوهاااام
تفضل أبو الأشعاااار
يااا حمار مفيش أعذااار
للراجل الحِشرة
محشووور في كل طبيخ
هو انت بقدووونس
نازل كدا تلبيييخ
زي ما الحمار فلعس
بامية على بطيييخ
عمال كدا تدعس
صحصح يا عم وفوووق
وكفاية شرب حشيش
ما حشيش بلدنا دوا
للمدمن المفلس
تاكله كدا ع الريق
هيكون علاج فعّال
هتخف م التنهيق
ولا تنخنق بسعال
وتفوووق من التلفيق
وهتبقى عال العال
ياما حمير أكلوه
بعد الهزاااال فاقوا
دوقه تلاقيه تريااااق
يعمل دماغ شغاااال
وبعد أن أصابته
نوبة إفاقة مفاجئة
فِهم الجدع واتفجع
طقّت عروقه... مات
ريّح... وجدله اتخلع
لا صوم ولا صلوات
يا ضاربين الودع
احكوا عليه حكايات
قولوا عليه كان نبي
يبكي معاكوا الغبي
لكنه في مذهبي
بهلول... بتاع حركات