الناس تستسقي الهمال يحيي البلاد
لكني استسقي ان الوصل يحيي القلوب
ياللي بتفسير شعري تبذلون اجتهاد
قصيدتي في الغزال اللي بلاده جنوب
اللي ليا راح نص الليل جاني الهجاد
من واهج الشوق وصدود الغزال اللعوب
يرعى هواها تلاع القلب مثل الجراد
اللي مسح خضرة الروضة قبال الغروب
يا ويل حالي عقب طال الهجر والبعاد
احس بالأرض كوكب ما تجيه الهبوب
قولوها تتصل فيني ذبحني السهاد
وانا عن معاند عيونه حرامٍ لتوب
حتى لو انه بغى يمشي معي بالعناد
راضي لو انه يسمي غترة الراس ثوب
المزنه اللي بياضٍ ما يشوبه سواد
الا افحم تنثره فوق المتن والكعوب
من عقب ما مل نجد وشال عفشه وعاد
لأبها خذا معه في عفشه أحن القلوب
مدري وش اخر تفاصيله لكن الوكاد
الصبح يشرب احاسيسي على كوب كوب
وبروح لأبها على شان الغلاء والبراد
ومن عقبها برجع لنجد العذية واذوب