هذا بياض الكف، وإلاّ قراطيس
وإلاّ، شعاعٍ حاضنه، في يدينه
من شدته تطفى شموع الفوانيس
والشمس تشهق لوكشف عن جبينه
لاسلهم بذيك، العيون النواعيس
أموت وأحيا، بين رمشه وعينه
عينٍ هدبها، مثل روس الدبابيس
بنظراتها، حد الرماح السنينه
ماذكرحسنه في الكتب والقواميس
ولا، مع اهل البادية، والمدينة
عقبه وأنا ليلي، حلوم وكوابيس
رجّعني لماضي، وذكرى حنينه
تمادت أفكارٍ براسي هجاريس
والقاف تنخى ما إرتضت للغبينه
والله لو دونه حصون ومتاريس
في وسط قصرٍ والحمى رافعينه
عنيت له مهما أجهدتني التضاريس
الصبر، شيمة من يريد الثمينة
وأضم كفه وأغمره بالأحاسيس
وكفيّ من النشوة، تضمّه يمينه
وأطلق سراح دموعي اللي محابيس
في موق عيني محتجزهن رهينه
وأتوه، في فرحة، بليا مقاييس
وأعيش، لحظة حب، بيني وبينه
وأقطف جنا وردٍ بصدره مغاريس
في روضةٍ دون النحر، زارعينه
وأعطرّ أنفاسي، بنفحة نسانيس
من الهروج الخاثرة، والرزينة
وأودع أوهامي، وذيك الهواجيس
وأودع الماضي، بز ينه وشينه
وأقول أنا لأهل القلوب المتاعيس
ياما حلا، جمعا الضنين بضنينه