كل إنة وليها أنة
كل ضحكة وليها رنة
والحكاية م البداية
لاهي فرض ولاهي سنة
مسرحية بايخة جدا
نيّمتنا هوه وننة
والنتيجة زي سيجة
والحصى بيموت عشانا
نعشق الوهم اللي فينا
اننا مرة انتصرنا
نلعب الدور اللي بعده
واللي بعده لاجل تارنا
تارنا منا.. وفينا ساكن.
والقرف في وشوشنا باين
والزمن عدَّى ما هدَّى
للقمر طلعت سفاين
واحنا لسه زيِّ ماحنا
واللي عنده عيون يعاين
لا بقينا... ولا هنبقى
طول ما هي محتاجة زقة
واللي راكب لسه راكب
فوقنا والسكينة سارقة
واللي جاي ابن اللي عدّى
لقمة ناشفة وعيشة خانقة