اكسر جدار الشرنقة

اكسر جدار الشرنقة،

واخرج بقى

وافرد جناحك للحياة اللي انت شايل همّها

وعنيها بيك متعلقة

وكفاية خوف من خطوتك

مش قسمتك..

.. تفضل أسير التأتأة.. واللألأة.. جوة التابوت

حدد ملامح كلمتك وبأعلى صوت

تصبح غناوي في سكتك..

.. تفتح شبابيك البيوت

وتشيل خيوط العنكبوت..

.. اللي ملت بالموت حدود المنطقة

مكتوب تعيش لحظة ميلادك..

.. تنطلق

بين البلابل والورود،..

.. زي العبير.. والزقزقة

وكفاية حبسة وزخنقة

ما بين حيطان..

.. حتى إذا كانت حرير.. أو بالحرير متزوّقة

دا الوحدة زي المشنقة.

مالهاش بِقى

لازم تطير

فيه ناس كتير متشوقة

اخرج بقى.. وكفاية موت

ما بين حيطان الشرنقة

حتى إذا كانت حرير.. أو بالحرير متزوقة

برضو حتفضل شرنقة

عتمة.. وخانقة.. وضيَّقة

اخرج بقى...

اخرج بقى