تطاول الليل والمشتاق ما نامه
كيف يْغفا جفن عينٍ سال مدمعها
انثر دموعي من الحرمان وآلامه
يا ليت عندي شجاعة واقدر امنعها
الحزن بين الضلوع مركّز خيامه
والنفس ما عادت الآمال تخدعها
استنفذ الشوق صبره واشهر اقلامه
يبي يصوغ الجزال اللي ربى معها
الشاعر اللي همومه مصدر الهامه
يمتع الناس بهمومٍ يصارعها
طرى على بالي المحبوب وايامه
وكل المواجع بصدري صار مرتعها
وجدي على الشام تاج المجد ووسامه
الشام مهد الحضارات ومنابعها
في حبها يفخر الهيمان بهيامه
هي قبلة الحب ما شيٍ ينازعها
ما شافها واسع الاحلام باحلامه
تنافس الحلم ويصحيه واقعها
السحر في جوها لا ذعذع انسامه
الياسمين يتعطربه شوارعها
ترابها من حريرٍ نادر الخامة
مرصعٍ باكرم الاحجار واروعها
فارقتها والتوجد طالت اعوامه
حتى الدفاتر معي بانت مواجعها
متى وصال الأحبة يكسر صيامه
متى عيوني بشوف الدار امتعها
متى الفرح في بلادي يرفع اعلامه
ويضمّد الجرح واوجاعه يودعها