كنت اشوفك شمس حبٍ ما تغيب
ويوم جيتك ما لقيت الا سراب
كل ما علقت بك هقوة تخيب
خيبةٍ تشبه شعور الاغتراب
كيف تهجرني وتتركني صويب
كيف تذبحني ولا تحسب حساب
فعلك بشرع الهوى ذنبٍ وعيب
يتلف الأعصاب ويجيب اضطراب
القطاعة ودي اعرف وش تجيب
والله ان كبدي من الخذلان ذاب
يوم اجيك احسبك لجروحي طبيب
تحرق فوادي وتمطرني عتاب
الملام يضيّق الصدر الرحيب
فيه يتغذى الحزن والاكتئاب
ما بقالك بالهوى قسم ونصيب
نرجسيتك دفعتني للغياب
ليه احبك وانت ما تصلح حبيب
ليه اغامر والهوى كله عذاب
الجمال المذهل الفخم الرهيب
ما يفيدك لو جمال الروح غاب
في خداعك لا تحسب انك لبيب
بتركك للوقت يعطيك الجواب
الصراحة والله ان امرك عجيب
من غرورك كنّ بعيونك ضباب
لا تبرر فعلك وكنّك مصيب
الخطا عمره مهو مثل الصواب