تزايد الشوق فيني مع مرور السنين
ومحاولاتي مع النسيان ضاعت سدى
الذكريات الحزينة والمكان الحزين
تهيّض الجرح والمشتاق ماله جدى
يمرني طيفك اللي من يسار ويمين
يصحي الشوق والنسيان توّه بدا
وش حيلتي لا غزت قلبي جيوش الحنين
وحكّمت عقلي ولكنّه عليّ اعتدى
استسلم الصبر قدام البكا والونين
ودمع الرياجيل ماهو من هوان وردى
يامن ذبحتيني بهجرك متى ترجعين
شوفك يخلي براكين الخفوق تهدى
وين العهود القديمة والوفا منك وين
نسيتي العهد ولا الغدر عندك بدى
تكفين لا تتركين عداي مستمتعين
أنتي تركتيني بحالٍ يسر العدا
أسهر وليلي م يشبه باقي الساهرين
في داخلي زحمة هموم وضجيج وصدى
ليلي ثقيل ودموعي كنها الرافدين
وفي الصدر غصة يضيق بها وسيع المدى
ليت الندامة تفيد وترحم النادمين
أو ليت الاحزان ترضى لو دفعنا فدا
اسلّي النفس بالشعر وعساها تزين
وادعي عسى الله يرزقني ثبات وهدى