كليني لهمي واتركي جرحي المستور
ولا تبلشيني بالهموم وسبايبها
حزين وجنود الحزن ما ترحم المأسور
والاوجاع تنشب في ضلوعي مخالبها
معي دمعةٍ ما فارقتني ثمان شهور
تقول الدموع تعدني من قرايبها
انا والفرح نعشق بعضنا بصدق شعور
لكن الليالي حبنا ما يناسبها
قضيت الحياة اكافح وخاطري مكسور
واواجه صعوبات الحياة ومتاعبها
اضمد جروحي واظهر بوجهي المسرور
دواعي السرور اليا ابعدت قمت اقربها
أكابر واقول بخير واضحك وانا مقهور
بوجه العواذل ضحكتي ما بخلت بها
وفي كل صبح اولد احلام وابعث نور
واعيد النظر والاولويات ارتبها
اتابع مسيري في دروب العلا مجبور
ونفسي سوى الامجاد ما شي يعجبها
ولي حكمةٍ ما ضيعتها سنين الجور
ولي شيمةٍ تعجز ظروفي تخربها
ولي سلوةٍ بالصبر، والحلم لي دستور
اقدر فعولي زين واحسب عواقبها
اغض النظر عن صاحبي لو لحقه قصور
عيوني عن عيوب الاوادم مجنبها
عجيب الامور بنظرتي عادي ومشهور
ولا زالت الايام تبدي عجايبها
حصدت التجارب في الزمان وقطفت زهور
واخذت النصايح من حكيمٍ مجربها
عساني على صبري بهذا الزمن ماجور
عسى الله يغفر ذنوب ماني بحاسبها