درب العلا ما يسلكه كل رجال
دربٍ عزيز وعسر ماهو بعادي
والمجد ما تبنيه عذبات الامال
تبنيه وقفات الهمام الريادي
يبنيه منهو للثقيلات شيال
اللي يضحي في سبيل المبادي
بعض البشر مثل الحرابي له أشكال
ماغير قلبه ثابتٍ بالسوادي
سنه ضحوك وقلبه اسود من الشال
ليته يغطى مثل ريم وهنادي
تقلبه طول الحياة ام العيال
وتوظفه ينقل علوم العبادي
راعي الردى تلقاه خاين ودجال
بينه وبين النعم عشرين وادي
فضٍ غليظ بوجه ربعه ومختال
ومع العدا هيّن وليّن وهادي
طبعه يمسح جوخ ويهزز اذيال
ويدور بربعه مكانٍ قيادي
اللي من العالم يبي يلبس جلال
ماهو كمن يصهل صهيل الجوادي
سلّم على اللي دوم له دور فعّال
يثبت على المبدا لو انه انفرادي
مقدام ما يمشي ورا شور جهال
يصدر قراره مثل قدح الزنادي
ابو طلال يثبت الجمع لا مال
مثل الجبال الراسية في بلادي
الشامخ اللي بالوفا مضرب امثال
درع القبيلة في جميع النوادي
ابو طلال الواضح بكل الاحوال
يوم ان بعض الناس لونه رمادي
قرمٍ يقدّي ربعه لطيب الافعال
بكل حلم وحكمة وبيض ايادي
شبيه ابوه اللي مع الناس لا زال
له ذكرٍ اطيب من نسيم البرادي
وله سيرةٍ تبقى على مر الاجيال
مصدر فخر وتفوح مسكٍ وكادي
زرع بذور المرجلة طيب الفال
وامتد لين الحين وقت الحصادي
نقطف ثمار الزرع والزرع باقبال
والحمد لله زرعنا بازديادي
لله در اشبال شجعان وابطال
عصبة سراجية عليها اعتمادي
تظهر بوقتٍ فيه نحتاج الاشبال
وقفاتهم ترعب قلوب الاعادي
بني سراج مهجدة كل عيال
ملجمين افواه فيها تمادي
في مدحهم سقت الجزيلات بالحال
قصيدةٍ فيها العلوم الوكادي
البستها من فخم الإبداع سلسال
عقدٍ من الألماس غير اعتيادي
اقول فيها الحق والحق ينقال
كشف الحقايق ذاك غاية مرادي
والحق ما يزعل سوى كل محتال
نشر الفضيلة مذهبي واعتقادي
نويت تجسيد القيم باحرف جزال
طالب من الله الهدى والرشادي
وصلاة ربي عد ما هل همال
وعداد سكان القرى والبوادي
على الرسول المصطفى غدو واصال
شفيعنا من هول يوم التنادي