بلبل حيران على الغصون
شجى معنى بالورد هايم
في الدوح سهران من الشجون
بكى وغنى والورد نايم
سكران بغير الكاس
فى مجلس الورد
من عنبر الانفاس
ومنظر الخد
يبص فوقه
ويبص تحته
يمد طوقه
يشم ريحته
فنان يحط
وفنان يشيل
وجناح يقوم به
وجناح يميل
فى ايد الليل
يلعب به
وراه الويل
يا قلبه
مجروح من ساقه
ومن طوقه
مادري بالشوك
من شوقه
من دوح لدوح
سهر ونوح
ياليل ده طير
بدن وروح
من فرع غصنه
ع الورد مال
وراح يمين
وجه شمال
قال له يا سوسن
يا تمر حنة
يا ورد احسن
من ورد الجنة
مين بالفرح لونك
ومن الشفق كونك
يا ريحة الحبايب
يا خد الملاح
لشوكة جمالك
وضعت السلاح
تبارك اللى خلق
ظلك من الخفة
و اللى كساك الورق
ولفه دى اللفة
زى القبل ولفت
شفة على شفة
يا ورد فوق لا الجناح
ينهض و لا الجرح يرقى
تشوفنى فى وقت الصباح
جسد على الارض ملقى