ألله واحد واحد بس

أَلله واحِدْ، واحِدْ بَسّ

اخْتَلْفوا عْلَيْه لْصوص الدّينْ

افْتَكْروا فيهُنْ يِطْفوا الشَّمْسْ

بْكِذْبُنْ.. وِيْغشّوا مْساكينْ

قالُولُنْ: شَعْبو الْمُخْتارْ

نحنا، وْأَلله مْبَارَكْنا

وْقالُولُنْ: قَتْلِ الْكُفّارْ

غايِةْ كلّ مْعَارِكْنا

وْقالُولُنْ: رَحْ نِغْزي الأرْضْ

بْإسْمو.. وِنْمَحّي الإلْحادْ

حَرْقوا الأَرْضْ، وْداسوا الْعَرْضْ

وْهَدْموا الْبَيْتْ الْ فِيه وْلادْ

وْقالُولُنْ: ضَحّوا بِالدَّمّ

تا تِرْضوا أَلله بْذاتو

دَبْحوا الْبَيّ، وْدَبْحوا الأمّ

وْوصل الدَّم لْجَنّاتو

أَلله واحِدْ.. عَلّي الصَّوْتْ

يا عَلي.. وْسَمِّعْ هَ النّاسْ

لا بَدّو جْهادْ وْلا مَوْتْ

بَدّو نْعيش جْناسِ جْناسْ

قْرِفْنا، قْرِفْنا مِنْ وَعْظاتْ

بَيْن حْروفا حقد وْوَيْلْ

لازِمْ نِرْجَعْ لِلْكِلْماتْ

الْ ضَوِّتْ "بِمَحَبِّتْها" اللَّيْلْ

كِلْماتَكْ.. يا نبعِ الْخَيْرْ

.. عَمْ تِسْقي فينا بْساتينْ

كِلْماتَكْ.. يا صَوْتْ الطَّيْرْ

.. هِدْيِتْ بِالْحَقّ مْلايينْ

كِذْبوا عْلَيْنا.. لا تْسَامِحْهُنْ

هِنّي الْ قَتْلوك وْقَتْلونا

وَدّي "سَيْفَكْ" عَ مْطارِحْهُنْ

يِقْطَعْ نَسْل اللي غَشّونا