عدّى شهر من بعد ليلة غيابك
ولالقيت لغيبتك أي تفسير
من هو مزعّل بس حضرة جنابك
إن كان أنا جمّعت كل المعاذير
خذي معاذيري وهاتي عتابك
مع إنّ منّي ماحصل أي تقصير
خليّني أبكي بس عيشي شبابك
خليّني أبكي دمّ عادي وش يصير؟
أصلاً أنا حزني وهمّي تشابك
والدمع والطعنات صاروا مسايير
وإذا الفرح جا قلت له ويش جابك؟
خلّك مع اللي غاب من دون تبرير
مانيب قايل للفرح ياهلا بك
لاجا يباغت وحدتي قلت له خير؟؟
لي يالفرح لاعاد تحسب حسابك
حزني مخاويني بكل المشاوير
حبيبتي وقّفت أنا عند بابك
كلي أمل واقف بوجه المقادير
مشتاق لك مشتاق حتى لعذابك
ياللي وصالك غير ومفارقك غير
عدّى شهر من بعد ليلة غيابك
ولا لقيت لغيبتك أيّ تفسير