مع السلامة قد تلفتني ظروف
عد الوبل من مجمعات القنوفي
مع السلامة والوسم فيه غطروف
اقفى وقفى من مزاين صيوفي
يا شوق كل ماغيب بالعمر مخلوف
يا شوق والدنيا بلاها مخلوفي
ماني قليّل بالآلاعيب مزهوف
وماني على الدنيا كثير الحسوفي
يا كيف صدري يمتلي هم وحسوف
ومن رحمةٍ بالله بفضله يروفي
أنا بعيوني بايج العمر معيوف
وقلبي عن الدنيا وأهلها عيوفي
وشايف شباب اليوم باللعب مخطوف
طيش الصغير اللي بعمره يسوفي
وشوفي عن اللي يخطي بحق مكفوف
وماعاضني لطم النحر في كفوفي
مع السلامة طاحنٍ سنّة الخوف
ما عاق عن حلمي وأبيض شفوفي
مع السلامة راقيه هامة النوف
اوفي بها ديني ومجمل حلوفي
مع السلامة من عقب سير معكوف
أعلنت مذهابي وطيّرت نوفي
أما بجابه جيّة الموت بوقوف
ولا صواريم الوغى من صفوفي
ما هبت من موتٍ له القلب مكتوف
وماني على طول السنين بشغوفي
وأنا مولّي يا أريش العين مضيوف
والعمر ما ياوي لطرقا ضيوفي
مانيب احب اللي يقدّم بمكلوف
ما يفلح اللي في حياته كلوفي
ومانيب أنادد بالحسن كل قطروف
وماني على طبع الجموع معسوفي
اردم واخفي من عنا قلب ملهوف
يا حيف من شيٍ بقلبي يحوفي
وأثري اوزّي شيّ بيّن ومكشوف
يظهر بعيني لا نظرت ويطوفي
وشيّ بحشاي من المحاويل موصوف
لا قلت فيني ضيق ليتك تشوفي
وأوّاه من شوقٍ مورّيني الحوف
وهوجاس كلّت من حموله كتوفي
قلبٍ تشوفه من شفا الرمح مقصوف
همّل دموع أم الجديل الزلوفي
من ونّة اللي من عنا الوقت مكسوف
يا جعل تكبر له حظوظٍ ردوفي
أعلنت مخلاصٍ به القلب متلوف
أعلنت مخلاصي وطاهر وصوفي
رجلٍ تهوم لحروة العز وتطوف
ويدٍ تسدد للخلايق وتوفي
وراسٍ تشوفه واصلٍ قاصي الجوف
ولبٍّ على ماقيل جامع نصوفي
قلبي على ماقيل يا شوق ملغوف
ولي نفس من حكم المعزة عزوفي
مع السلامة والفنا حق منصوف
والموت خاتم للعنا والصدوفي
والطِيب بالدنيا مثمّر ومقطوف
وما ينتمي الطيّب لعوج الشنوفي
وأنعم وأكرم باذلٍ كل معروف
عسى الولي يجزل بعَملٍ كنوفي
وبحفظ ربي عدّ ماهب مشعوف
والحمد للي سدّ شهبا حفوفي
وابل من أنعامٍ على قلب محيوف
محيوف من ربي وسترٍ سدوفي
وداعة الله للوطن حبر وحروف
ووادعة الله للحلوم الرعوفي
ووداعة الله ناصي جنان وريوف
وكل الذي يقرأ بقايا حروفي
يا شفٍ قلبٍ غمّد رِماح وسيوف
لا شك دونك يمنعنّي ظروفي
وداعة الله واليٍ كل عجروف
وداعة اللي في عبيده عطوفي