تدري لقيتك غرس ماسرّ قاعه
طلعك مثل روس الشياطين دارق
لو تعتذر بالملح مالك شفاعه
يا غصن ظلك مالقا منك وارق
مسكين منهو جاير الفقد راعه
حزنه يقين وبأزرق الدمع شارق
شفته ينوح وجاير الهم لاعه
يقول خلّي حظ داعيه مارق
جيته معي دمع المحاجر بضاعة
ان ماوفا كيله فأنا جيت سارق
عانت مشاعر صاحبه من مجاعة
والجوع كافر موجع النفس حارق
أرقب بشير الوصل عقب القطاعة
وموحش ظلام الهجر ما فيه طارق
زاد انتظاري وجه ضيقي شناعة
كنّي سجين ابداخل السجن غارق
عيّا ظلام الحزن يكشف قناعه
وعيّا صدى الذكرى يروح ويفارق
ما عاد صبري فيه حلم وشجاعه
ولا عاد يا صبحي لك يلوح شارق
قلت أنت مالك عند خلّك شفاعه
لو مجلسه ويّاك فوق النمارق
وقفت ذكرى تعتصر نبض ساعه
وحيرة وقوفك طوّلت بالمفارق
عندي يقين اليوم مدري قناعه
إنه سحاب يلوح ما فيه بارق